ЕВРО5 92 ШАТАХУУН ЗАРЦУУЛАЛТ ЭНГИЙН АИ92 ХЭРЭГЛЭСНЭЭС 10 ХУВЬ ИЛҮҮ БАЙДАГ БАЙНА

АИ-92 болон Евро-92: ижил октантай ч чанараар ялгаатай хоёр бүтээгдэхүүн.

Монголд одоогоор энгийн АИ-92 болон Евро-5 стандартын АИ-92 (Евро-92) хоёр төрлийн бензин зэрэг зарагдаж байгаа бөгөөд эдгээрийг “ижил” гэж ойлгох нь буруу гэдгийг мэргэжилтнүүд онцолж байна.

Хоёр бензин аль аль нь 92 октантай тул хөдөлгүүрт үзүүлэх дэлбэрэлтийн эсэргүүцэл нь адилхан юм шиг санагдаж болно. Гэвч ялгаа нь октаны тоонд бус, экологийн стандарт буюу хүхрийн агууламжид оршдог. Ашигт малтмал, газрын тосны газрын мэргэжилтнүүдийн тайлбарласнаар нэрлэлт нь “АИ-92” гэсэн ижил боловч Евро-2 болон Евро-5 стандартын хооронд бодит зөрүү байдаг.

Мэргэжилтэн Ч.Чулуунбатын дурдсанаар энгийн (Евро-2 түвшний) АИ-92-т хүхрийн агууламж 500 ppm хүртэл байхыг зөвшөөрдөг бол Евро-5 ангиллын АИ-92-т 10 ppm-ээс бага байхыг шаарддаг. Лабораторийн шинжилгээгээр энгийн бензин 193 ppm, Евро-5 бензин 9.2 ppm гарсан нь стандартын шаардлагыг хангасан хэдий ч зөрүү тодорхой байгааг харуулж байна.

Хүхрийн бага агууламж нь хөдөлгүүрийн катализаторыг хамгаалж, утаа хийн бохирдлыг бууруулдаг тул Евро-5 бүтээгдэхүүн байгаль орчны хувьд илүү дэвшилтэт гэж тооцогддог. Харин үүний зэрэгцээ Евро-5 стандартын бензин илүү шатамхай тул энгийн АИ-92-оос 5-10 хувь илүү зарцуулалттай болохыг АҮЭБЯ-ны Газрын тосны бодлогын газрын дарга Ч.Хишигдалай мэдэгдсэн. Хоёр төрлийн бензины үнэ 1000-2000 төгрөгийн зөрүүтэй.

Оросын шатахууны хямралтай холбоотойгоор Монгол улс саяхан БНХАУ-аас Евро-5 стандартын АИ-92 импортолж эхэлсэн бөгөөд энэ нь нийлүүлэлтийн эх үүсвэрийг олшруулах зорилготой болохыг мэргэжилтнүүд тайлбарлаж байна.